Jashari pret në takim ambasadorin e Shqipërisë në Kosovë, flasin për bashkëpunimin mes FSK-së dhe FARSH-it

13:33 | 10 Shtator 2024
K.B

Komandanti i Forcës së Sigurisë së Kosovës (FSK), Gjenerallejtënant Bashkim Jashari ka pritur në takim ambasadorin dhe Atasheun e Mbrojtjes së Republikës së Shqipërisë, Petrit Malaj, si dhe Atasheun e Mbrojtjes Kolonel Beqir Tafili, i cili sapo është emëruar në këtë pozitë.

Në njoftimin nga FSK-ja thuhet se KOMFSK informoi Ambasadorin Malaj dhe Kolonel Tafilin mbi arritjet, planet dhe zhvillimin e FSK-së drejt një force profesionale dhe të ndërveprueshme me NATO-n.

Gjatë takimit në theks të veçantë u fol për bashkëpunimin e shkëlqyer në mes të Forcës së Sigurisë së Kosovës dhe Forcave të Armatosura të Republikës së Shqipërisë.

“KOMFSK uroi emërimin e Atasheut të Mbrojtjes në Republikën e Kosovës, si dhe në të njëjtën kohë shprehu vullnetin për vazhdim dhe rritje të bashkëpunimit të ngushtë mes të dyja vendeve”, thuhet në njoftimin nga FSK./Arbresh.info/